GetPassageurn:cts:pbc:bible.parallel.deu.luther1545letztehand:52urn:cts:pbc:bible.parallel.deu.luther1545letztehand:52Paulus vnd Siluanus vnd Timotheus . Der Gemeinen zu Thessalonich / in Gott dem Vater / vnd dem Herrn Jhesu Christo . Gnade sey mit euch vnd Friede von Gott vnserm Vater / vnd dem Herrn Jhesu Christo . WJR dancken Gott allezeit fur euch alle / vnd gedencken ewer in vnserm Gebet / on vnterlas / Vnd dencken an ewer werck im glauben / vnd an ewer erbeit in der Liebe / vnd an ewr gedult in der Hoffnung / welche ist vnser Herr Jhesus Christus fur Gott vnd vnserm Vater . Denn lieben Brüder / von Gott geliebet / wir wissen / wie jr ausserwelet seid / das vnser Euangelium ist bey euch gewesen / nicht allein im wort / sondern beide in der Krafft vnd in dem heiligen Geist / vnd in grosser gewisheit / Wie jr wisset / welcherley wir gewesen sind vnter euch / vmb ewren willen . VND jr seid vnser Nachfolger worden vnd des Herrn / vnd habt das Wort auffgenomen vnter vielen trübsaln mit freuden im heiligen Geist / Also / das jr worden seid ein Furbilde allen gleubigen in Macedonia vnd Achaia . Denn von euch ist auserschollen das wort des Herrn / nicht allein in Macedonia vnd Achaia / sondern an allen Orten ist auch ewer glaube an Gott ausgebrochen / also / das nicht not ist / euch etwas zusagen . Denn sie selbs verkündigen von euch / was fur einen Eingang wir zu euch gehabt haben / vnd wie jr bekeret seid zu Gott / von den Abgöttern / Zu dienen dem lebendigen vnd waren Gott / vnd zu warten seines Sons vom Himel / welchen er aufferwecket hat von den Todten / Jhesum / Der vns von dem zukünfftigen Zorn erlöset hat . Denn auch jr wisset / lieben Brüder / von vnserm Eingange zu euch / das er nicht vergeblich gewesen ist / Sondern als wir zuuor gelidden hatten / vnd geschmecht gewesen waren zu Philippen / ( wie jr wisset ) waren wir dennoch freidig in vnserm Gott / bey euch zusagen das Euangelium Gottes / mit grossen kempffen . Denn vnser Ermanung ist nicht gewesen zu jrthum / noch zu vnreinigkeit / noch mit list / Sondern wie wir von Gott bewerd sind / das vns das Euangelium vertrawet ist zu predigen / Also reden wir / Nicht als wolten wir den Menschen gefallen / sondern Gotte / der vnser hertz prüfet . Act . 16 . Denn wir nie mit Schmeichelworten sind vmbgangen ( wie jr wisset ) noch dem Geitz gestellet / Gott ist des zeuge / Haben auch nicht Ehre gesucht von den Leuten / weder von euch / noch von andern / Hetten euch auch mögen schweer sein / als Christi Apostel . Sondern wir sind mütterlich gewesen / bey euch / Gleich wie eine amme jrer Kinder pfleget / Also hatten wir Hertzenlust an euch / vnd waren willig euch mit zuteilen / nicht allein das Euangelium Gottes / sondern auch vnser Leben / darumb / das wir euch lieb haben gewonnen . JR seid wol eindechtig / lieben Brüder / vnser erbeit vnd vnser mühe / Denn tag vnd nacht erbeiten wir / das wir niemand vnter euch beschwerlich weren / vnd predigeten vnter euch das Euangelium Gottes . Des seid jr Zeuge vnd Gott / wie heilig vnd gerecht vnd vnstrefflich wir bey euch ( die jr gleubig waret ) gewesen sind . Wie jr denn wisset / das wir / als ein Vater seine Kinder / einen jglichen vnter euch ermanet vnd getröstet / vnd bezeuget haben / Das jr wandeln soltet wirdiglich fur Gott / der euch beruffen hat zu seinem Reich vnd zu seiner Herrligkeit . 2 . Thes . 3 Act . 20 . Darumb auch wir on vnterlas Gotte dancken / das jr / da jr empfienget von vns das Wort göttlicher predigt / namet jrs auff / nicht als Menschenwort / sondern ( wie es denn warhafftig ist ) als Gottes wort / welcher auch wircket in euch / die jr gleubet . Denn jr seid Nachfolger worden / lieben Brüder / der gemeine Gottes in Judea / in Christo Jhesu / Das jr eben das selbige erlidden habt von ewern Blutfreunden / das jene von den Jüden / Welche auch den Herrn Jhesum getödtet haben / vnd jre eigen Propheten / vnd haben vns verfolget / vnd gefallen Gotte nicht / vnd sind allen Menschen wider / wehren vns zu sagen den Heiden / damit sie selig würden / Auff das sie jre sünde erfüllen allwege / Denn der Zorn ist schon endlich vber sie komen . WJR aber / lieben Brüder / nach dem wir ewer eine weil beraubet gewesen sind / nach dem angesichte / nicht nach dem hertzen / haben wir deste mehr geeilet / ewer angesicht zu sehen / mit grossem verlangen . Darumb haben wir wollen zu euch komen ( Jch Paulus ) zwey mal / vnd Satanas hat vns verhindert . Denn wer ist vnser Hoffnung oder Freude / oder Kron des rhums ? Seid nicht auch jrs fur vnserm Herrn Jhesu Christo / zu seiner zukunfft ? Jr seid ja vnser ehre vnd freude . Darumb haben wirs nicht weiter wollen / vertragen / vnd haben vns lassen wolgefallen / das wir zu Athene alleine gelassen würden / Vnd haben Timotheum gesand / vnsern bruder vnd diener Gottes / vnd vnsern gehülffen im Euangelio Christi / euch zu stercken vnd zu ermanen in ewrem glauben / Das nicht jemand weich würde in diesen trübsaln . Denn jr wisset / das wir da zu gesetzt Das ist / Es wil nicht anders sein . sind / Vnd da wir bey euch waren / sagten wirs euch zuuor / Wir würden trübsaln haben müssen / wie denn auch geschehen ist / vnd jr wisset . Darumb ichs auch nicht lenger vertragen / hab ich ausgesand / das ich erfüre ewren glauben / Auff das nicht euch vieleicht versucht hette der Versucher / vnd vnser erbeit vergeblich würde . Act . 17 . NV aber / so Timotheus zu vns von euch komen ist / vnd vns verkündiget hat ewren glauben vnd liebe / vnd das jr vnser gedencket allezeit zum besten / vnd verlanget nach vns zu sehen / wie denn auch vns nach euch . Da sind wir / lieben Brüder / getröstet worden an euch / in allem vnsern trübsal vnd not / durch ewren glauben . Denn nu sind wir lebendig / dieweil jr stehet in dem Herrn . Denn was fur einen Danck können wir Gott vergelten vmb euch / fur alle diese freude / die wir haben von euch fur vnserm Gott ? Wir bitten tag vnd nacht fast seer / das wir sehen mügen ewer angesichte / vnd erstatten / so etwas mangelt an ewrem glauben . ER aber / Gott vnser Vater / vnd vnser Herr Jhesus Christus / schicke vnsern weg zu euch . Euch aber vermehre der Herr vnd lasse die liebe völlig werden vnternander / vnd gegen jederman ( wie denn auch wir sind gegen euch ) das ewre hertzen gesterckt vnd vnstrefflich seien / in der heiligkeit fur Gott vnd vnsern Vater / auff die zukunfft vnsers Herrn Jhesu Christi sampt allen seinen Heiligen . Weiter / lieben Brüder / bitten wir euch / vnd ermanen in dem Herrn Jhesu / Nach dem jr von vns empfangen habt / wie jr sollet wandeln vnd Gotte gefallen / das jr jmer völliger werdet . Denn jr wisset / welche Gebot wir euch gegeben haben / durch den Herrn Jhesum . Denn das ist der wille Gottes / ewer Heiligung / das jr meidet die Hurerey / vnd ein jglicher vnter euch wisse sein Fas zubehalten / in heiligung vnd ehren / nicht in der lust seuche / wie die Heiden / die von Gott nichts wissen . Vnd das niemand zu weit greiffe noch verforteile seinen Bruder im Handel / Denn der Herr ist der Recher vber das alles / wie wir euch zu vor gesagt vnd bezeuget haben . Denn Gott hat vns nicht beruffen zur vnreinigkeit / sondern zur heiligung . Wer nu verachtet / Der verachtet nicht Menschen / sondern Gott / der seinen heiligen Geist gegeben hat in euch . VON der brüderlichen Liebe aber / ist nicht not euch zu schreiben . Denn jr seid selbs von Gott geleret / euch vnternander zu lieben / vnd das thut jr auch an allen Brüdern / die in gantz Macedonia sind . Wir ermanen euch aber / lieben Brüder / das jr noch völliger werdet / Vnd ringet darnach / das jr stille seid / vnd das ewre schaffet / Vnd erbeitet mit ewren eigen henden / wie wir euch geboten haben / Auff das jr erbarlich wandelt gegen die / die draussen sind / vnd jrer keines das ist / Neeret euch selber vnd ligt nicht den Leuten auff dem Halse / wie die faulen Bettelmünche / widerteuffer Landleuffer / Denn solche sind vnnütze Leute / vnd ergern die vngleubigen . bedürffet . Wjr wollen euch aber / lieben Brüder / nicht verhalten von denen die da Schlaffen / Auff das jr nicht trawrig seid / wie die andern / die keine hoffnung haben . Denn so wir gleuben / das Jhesus gestorben vnd aufferstanden ist / Also wird Gott auch / die da entschlaffen sind durch Jhesum / mit jm füren . Denn das sagen wir euch / als ein wort des Herrn / Das wir / die wir leben vnd vberbleiben in der zukunfft des Herrn / werden denen nicht vorkomen die da schlaffen . Denn er selbs der Herr wird mit einem Feldgeschrey vnd stimme des Ertzengels / vnd mit der posaunen Gottes ernidder komen vom Himel / Vnd die Todten in Christo werden aufferstehen zu erst . Darnach wir / die wir leben vnd vberbleiben / werden zu gleich mit denselbigen hin gerückt werden in den wolcken / dem Herrn entgegen in der lufft / vnd werden also bey dem Herrn sein alle zeit . So tröstet euch mit diesen worten vnternander . VON den zeiten aber vnd stunden / lieben Brüder / ist nicht not euch zu schreiben / Denn jr selbs wisset gewis / das der tag des Herrn wird komen / wie ein Dieb in der nacht . Denn wenn sie werden sagen / Es ist friede / Es hat keine fahr / So wird sie das verderben schnel vberfallen / Gleich wie der schmertz ein schwanger Weib / vnd werden nicht entpfliehen . JR aber / lieben Brüder / seid nicht in der finsternis / das euch der tag wie ein Dieb ergreiffe / Jr seid allzumal Kinder des liechtes vnd Kinder des tages / Wir sind nicht von der nacht noch von der finsternis . So lasset vns nu nicht schlaffen / wie die andern / sondern lasset vns wachen vnd nüchtern sein . Denn die da schlaffen / die schlaffen des nachtes / vnd die da truncken sind / die sind des nachts truncken . Wir aber die wir des tages sind / sollen nüchtern sein / Angethan mit dem Krebs des glaubens vnd der Liebe / vnd mit dem Helm der Hoffnung zur seligkeit . Denn Gott hat vns nicht gesetzt zum zorn / sondern die seligkeit zu besitzen / Durch vnsern Herrn Jhesum Christ / der fur vns gestorben ist / Auff das / wir wachen oder schlaffen / zu gleich mit jm leben sollen . Darumb ermanet euch vnternander / vnd bawet einer den andern / wie jr denn thut . Wjr bitten aber euch / lieben Brüder / das jr erkennet die an euch erbeiten vnd euch furstehen in dem Herrn / vnd euch vermanen / Habt sie deste lieber / vmb jres wercks willen / vnd seid friedsam Beleidiget sie nicht / vrteilet vnd murrt nicht wider sie / Meistert noch vberklügelt sie nicht . mit jnen . Wir ermanen aber euch / lieben Brüder / vermanet die Vngezogen / Tröstet die Kleinmütigen / Traget die Schwachen / Seid gedültig gegen jederman . Sehet zu / das niemand böses mit bösem jemand vergelte / Sondern allezeit jaget dem guten nach / beide vnternander vnd gegen jederman . Seid allezeit frölich / Betet on vnterlas / Seid danckbar in allen dingen / Denn das ist der wille Gottes / in Christo Jhesu / an euch . Den Geist dempffet Wiewol die Geister sich sollen richten lassen von der Gemeine j . Cor . 4 So sol man sie doch auch widerumb nicht vnerkand dempffen oder verstossen / sondern verhören vnd prüfen . Also die Weissagung auch / vnd alle lere . nicht . Die Weissagung verachtet nicht . Prüfet aber alles / vnd das Gute behaltet . Meidet allen bösen schein . Er aber der Gott des Friedes / heilige euch durch vnd durch / vnd ewer Geist gantz Das ist / in allen stücken / als im glauben / liebe hoffnung / wort / wercken etc . sampt der Seele vnd Leib / müsse behalten werden vnstrefflich auff die zukunfft vnsers Herrn Jhesu Christi . Getrew ist Er / der euch rüffet / welcher wirds auch thun . Lieben Brüder / betet fur vns . Grüsset alle Brüder mit dem heiligen Kus . Jch beschwere euch bey dem Herrn / das jr diese Epistel lesen lasset allen heiligen Brüdern . Die gnade vnsers Herrn Jhesu Christi sey mit euch / AMEN . - An die Thessalonicher die Erste / geschrieben von Athene .